1-بعد ما الكفيل يكلمك في التليفون انك اتقبلت ونجحت في المقابله يروح هو باعت جواب الوكاله علي مكتب السفريات الي بيتعامل معاه في مصر + العقد 0(القنصليه لا تتعامل مع افراد انما مع مكاتب التسفير المعتمده لديها فقط)
2-تروح المكتب وتمضي العقد وتاخده معاك عشان تروح التامينات تغير البطاقه بالمهنه اللي في العقد عشان لازم المهنه تطابق مع الجواز
3-تروح التامينات في شارع الالفي وتروح تامينات العاملين بالخارج وتدفع (80 دولار )وتكون جايب معاك ورق بطاقه مستعجل من العباسيه( ب75 جنيه)(بتطلع بعد 3 ايام) عشان يتختم بس في مشكله هنا لو انت في شركه خاصه ومتأمن عليك لازم تطلع من التامينات بتاعتها ولو في الحكومه يبقي لازم اجازه.
4-بعد كده تاخد ورق البطاقه المختوم وتروح العباسيه وبعد3 ايام تاخد البطاقه الجديده bravo.gif مبروك يا نجم
5-تروح للجوازات اللي انت تبعها وتاخد صورتين خلفيه بيضاء ولو معاك الباسبور القديم تاخده عشان يتلغي وتطلع البازابورت المميكن الجديد بتاع البني أدمين وتدفع (110 جنيه )وتاخده بعد يومين
6-في اليومين دول تروح الجامعه توثق الشهاده بتاعتك من امين عام الجامعه ولو انت طب او صيدله لازم الشهاده الكارتون غير كده ممكن المؤقته
7-بعد الجامعه تروح اي مكتب تصديق للخارجيه وتدفع( 11 جنيه) وتاخد الشهاده
8-غالبا هتلاقي المهنه لاتناسب المؤهل الدراسي بتاعك يبقي لازم شهاده خبره ودي تشوفلك اي حد معاه سجل تجاري وتاخده الشهر العقاري وتكون مظبط شهاده خبره بنفس المسمي الوظيفي ولازم يكون السجل متجدد وبعد كده تروح الخارجيه توثقها زي الشهاده. وفي خطوه كمان مكتب السفريات بيعملها في الحاله دي انه يجيب جواب من الكفيل انه عارف ان مؤهلك غير المهنه بس هو عايزك انت بالذات هما معاهم صيغه معروفه.
9-بعض المهن تحناج شهاده قياس مهاره ودي تروح مكتب العمل تعملها وغالبا المهن دي زي فني اي حاجه او عامل اي حاجه تحتاج مهاره زي ميكانيكي ومبيض..... الخ
10-اخ احنا نسينا الجواز زمانه اتحرق اوكي تروح الجوازات تاخد الباسبور وبعد كده تاخد الورق ده كله في زكيبه وتروح مكتب السفريات.
11-مكتب السفريات هايعملك تسجيل علي النت بتاع شركه التاشيرات الالكترونيه الجديده انجاز ويديلك الرقم
12-تاخد الرقم وتروح بيها معامل وزاره الصحه بشارع الشيخ ريحان (تنزل مخطه مترو السادات وتسأل هناك)عشان تحليل الفيروس وتدفع (120) جنيه وصورتين خلفيه بيضاء ولازم تتصل( 16082) علشان تحجز معامل الوزارة ولازم يكون قبلها بيوم علشان يرضى يدخلك
13-بعد مايخدوا العينه هايدولك كارت تستلم بيه بعد 3 ايام وطبعا من غير ما اقول لازم تكون هناك الساعه( 8 او 8.30) عشان تكون علي الساعه( 10 او 11) مخلص بعد كده تطلع تتمشي من الوزاره الي شركه جامكا GAMCA في 6 شارعه عاءشه التيموريه بجاردن سيتي امام قسم قصر النيل هاتديهم الباسبور علي الباب وتقعد (10 دقايق) وبعدين هايدولك جواب تحويل لمستشفي من خمس مستشفيات تبعهم
14-تاخد الجواب وتروح المستشفي اللي كاتبينها في الجواب وتروح المستشفي وتدفع 275 جنيه ويعملولك شويه تحاليل وكشف نظر وباطنه ويقلعوك البنطلون اي والله مش عارف ده كشف ايه وتاني يوم تيجي تاخد النتيجه وممكن تخليها مع نتيجه الفيروس عشان يبقي مشوار واحد
15-شوفت نسبنا ايه يامعلم ... الفيش تروح بصورتين خلفيه بيضاء تعمل فيش وتكتب فيه الغرض السفر للسعوديه
16-تجيب زكيبه تانيه غير الاولانيه اللي اتملت وتعبي بقيت الورق وتطلع علي مكتب السفريات وتديله 3صور خلفيه بيضاء
17-المكتب يقدم الورق للقنصليه يوم الاحد او التلات والتأشيره تاخدلها 10 ايام وبعد يومين من التقديم لو ما اترفضش الورق يبقي كده تمام.
ان شاء الله هنتكلم النهاردة علي موضوع شهادة قياس مستوي المهارة
والشهادة دي بتحتاجها لما تكون المهنة اللي في العقد بتاعك مهنة حرفية او فنية زي (مهن البناء والاخشاب زي حداد او لحام او نجار او عامل بناء او كهربائي او فني ....... )
والشهادة دي هتستخدمها في تغيير المهنة في البطاقة الشخصية علشان بعد كده تغير المهنة في جواز السفر وكمان هتحتاج تقدمها مع ورقك في السفارة بعد متوثقها من الخارجية علشان تاخد التأشيرة ان شاء الله .
ودلوقتي الشهادة دي هتطلعها ازاي ؟
هتروح مكتب العمل او مكتب التشغيل اللي في مكان اقامتك وده بيبقي تابع لوزارة القوي العاملة والهجرة
هتعمل حوالة بريدية بمبلغ( 40 جنيه) لحساب مدير عام القوي العاملة في المحافظة اللي انت تابع ليها ( او زي ما مكتب العمل يقولك بالظبط ) + صورة البطاقة وبعدين هيديلك ميعاد علشان تعمل اختبار وده بيتعمل في اي مدرسة صناعية وده عادة بيبقي اجراء روتيني وان شاء الله الكل ينجح فيه
تروح تاني يوم تستلم شهادة قياس مستوي المهارة
تروح بعد كده علي نقابة مهن البناء والاخشاب او نقابة العمال وتدفع هناك( 15 جنيه) رسوم عضوية النقابة وهتاخد ايصال بالمبلغ وشهادة عضوية بالنقابة وكمان هتختم استمارة بطاقة الرقم القومي من النقابة
الخطوة التالية توثيق الشهادة من الخارجية :
لازم تتطلع الاول كارنيه ترخيص مزاولة المهنة من القوي العاملة وده بيطلع من مكتب العمل اللي انت طلعت منه شهادة قياس مستوي المهارة وهتحتاج
1- حوالة بريدية بمبلغ( 30)( جنيه لحساب مدير عام القوي العاملة
2 - شهادة عضوية بالنقابة
3 - صورة البطاقة وصورة شهادة قياس مستوي المهارة وصورة شخصية
وتروح تستلم الكارنيه مختوم بختم النسر تاني يوم من مديرية القوي العاملة
تاخد الكارنيه وشهادة قياس المهارة و مبلغ 11 جنيه وتروح اي مكتب تصديقات تابع لوزارة الخارجية علشان تصدق علي الشهادة
عناوين مكاتب التصديقات في الجمهورية :
http://www.mfa.gov.eg/MFA_Portal/ar-...on+offices.htm

تصريح العمل : وده بيصدر من تصاريح العمل ودي تابعة لوزارة الداخلية ولو هتطلعه لاول مرة هتحتاج 3 صور خلفية بيضاء+صورة الطاقة + صورة الجواز صفحة 1 اللي فيها البيانات والصفحة اللي فيها التأشيرة المؤهلات العليا بيدفع حوالي (126() جنيه والمؤهلات المتوسطة بيدفع( 87 جنيه) والمصاريف دي عن كل سنة انت شغالها بره مصر وتستلمه بعد 3 ايام وتصريح العمل بيتجدد كل ما تنزل اجازة وده كان بالنسبة لتصريح العمل
تصريح السفر : وده للناس اللي في سن التجنيد وهتكلم عنه بالتفصيل في المشاركة التالية .
تذاكر الطيران : فيه خطوط طيران كتير ليها رحلات للسعودية فيه مصر للطيران والخطوط السعودية وطيران ناس وطيران سما وطبعا انت هتبقي مسافر شغل فبتبقي ذهاب فقط .
طيران ناس بيبقي من الاسكندرية وبيروح جدة والرياض بس
طيران سما رحلاته من مطار النزهة بالاسكندرية وعلي ما اذكر من مطار اسيوط كمان وبيروح جدة والرياض والدمام
وانا حجزت فيه الاسكندرية - الدمام مباشر والتذكرة كانت( ب_ 1150 جنيه ) الكلام ده من يومين بالظبط بس موسم الحج التذاكر اكيد هتغلي شوية
مصر للطيران اغلي من سما بكتير يعني من القاهرة للرياض او الدمام في حدود من( 1750 الي 2000) وومكن تزيد حسب المستوي والمواعيد .
والخطوط السعودية اسعارها قريبة من مصر للطيران واحد صاحبي حجز القاهرة الرياض( بــــ 1750 جنيه )من 3 ايام.